ორგანოთა ტრანსპლანტაციის ცენტრები

ორგანოთა ტრანსპლანტაციის ცენტრები

ორგანოთა გადანერგვის პირველი ექსპერიმენტების შემდეგ ას წელზე მეტი გავიდა. წარსულში გადანერგვის ექსპერიმენტები მხოლოდ ცხოველებზე ტარდებოდა. ადამიანისთვის ორგანოს გადანერგვა პირველად დაახლოებით 50 წლის წინ განხორციელდა. მედიცინისა და ჯანდაცვის მიღწევების წყალობით, ამჟამად ორგანოთა ტრანსპლანტაციამ მიაღწია დონეს, რომელიც ადამიანებს სიცოცხლეს უნარჩუნებს.

აჯიბადემის ჯანმრთელობის დაცვის ჯგუფმა (ACIBADEM Healthcare Group), რომელიც რეფერალური ცენტრია ბევრი კომპლექსური მკურნალობისთვის, ბევრ წარმატებას მიაღწია თურქეთში და პირველია ორგანოთა და ქსოვილთა გადანერგვაში. აჯიბადემში პირველად ჩატარდა თირკმლის გადანერგვა ჩვილისთვის ყველაზე დაბალი წონით; 84 წლის დონორის პირველი დონორული ნეფრექტომია; პირველი ერთპორტიანი დონორული ნეფრექტომია; პირველი დონორული ნეფრექტომია საშოდან NOTES მეთოდით; პირველი თირკმლის ტრანსპლანტაცია 85 წლის დონორისგან ტვინის სიკვდილით; პირველად განხორციელდა დედა-დონორისგან ღვიძლის ნაწილის გადანერგვა მისი 8 წლის შვილისთვის და ეს ყველაფერი ამგვარი მიღწევების მხოლოდ მცირედი ჩამონათვალია. 

ორგანოთა ტრანსპლანტაციის სფეროში ყოველდღიურად დამაიმედებელი სიახლეები აღინიშნება. რეციპიენტები და დონორები, ასევე მეცნიერები და ექიმები იბრძვიან პაციენტთა უფრო ჯანმრთელი და ხანგრძლივი სიცოცხლის უზრუნველსაყოფად.

ორგანოს/ქსოვილის დისფუნქციამ ზოგჯერ მთელი ორგანიზმის მუშაობის სწრაფი გაუარესება შეიძლება გამოიწვიოს. მიუხედავად იმისა, რომ ორგანოს ფუნქციური უკმარისობის მქონე პაციენტის მკურნალობის სხვა მეთოდებიც არსებობს, ტრანსპლანტაცია საუკეთესო ალტერნატივად ითვლება თერაპიული ეფექტის, ცხოვრების ხარისხის და ხარჯეფექტურობის თვალსაზრისით.

ორგანოს/ქსოვილის გადანერგვა ნიშნავს ერთი ადამიანის სხეულიდან, ან დონორული უბნიდან ორგანოს/ქსოვილის გადატანას პაციენტის სხეულში. ორგანოს/ქსოვილის გადანერგვით ხდება დაზიანებული ან არარსებული ორგანოს ჩანაცვლება. თირკმლის უკმარისობა, ღვიძლის უკმარისობა, ფილტვების ან გულის დაავადებები, I ტიპის დიაბეტი და კიბოს ზოგიერთი სახეობა, როგორიცაა ლეიკემია, ის მდგომარეობებია, რომელთა მკურნალობა შესაძლებელია მოხდეს ორგანოს/ ქსოვილის გადანერგვით. ორგანოს/ ქსოვილის გადანერგვა შეიძლება მოხდეს იმავე ადამიანის სხეულში, რასაც ავტოტრანსპლანტაცია ეწოდება, ან სხვა ადამიანისაგან განხორციელდეს, რასაც ეწოდება ალოტრანსპლანტაცია.

დონორის ტიპის მიხედვით, ორგანოს/ქსოვილის ტრანსპლანტაცია ორ ტიპად იყოფა: ცოცხალი დონორისგან და გარდაცვლილი დონორისგან (ინტენსიური თერაპიის განყოფილებაში მყოფი პაციენტები ტვინის სიკვდილით). რადგან ადამიანს აქვს ორი თირკმელი და ერთი თირკმელი ორგანიზმის ნორმალური მუშაობისთვის სრულიად საკმარისია, ასევე ღვიძლი რეგენერაციის უნარის მქონე ორგანოა, თირკმლისა და ღვიძლის გადანერგვა შეიძლება განხორციელდეს  ცოცხალი დონორისგან.

×
ძიება